黃心遊世界 YellowSumTravel

好多朋友都知我哋度蜜月係去左東非---坦桑尼亞。。。一向都鍾意睇動物，去睇動物大遷徙係我地必然嘅checklist，咁度蜜月就係最佳原因，哈哈。

如果有無限時間, 係可以由Buenos Aires坐車OR揸車去Calafate, 但可惜我無 (之後坐長途車機會多的是), 咁我地選乘可能係世界上<"最好">嘅Airline - LAN, 去到機場check-in櫃台先話我地知班機取消左, 仲用SMS通知我地喎, 我地香港電話號碼係阿根廷收唔到果個SMS喔! 點解無e-mail通知呢!!! 處理分流嘅地勤姐姐又點解唔知cancel左Calafate班機, 仲叫我地排多半個鐘隊先話我知呢!!! 之後又要去排另一個counter攪轉航班, 打亂晒我地個plan, 又害我地俾多一晚hostel $, 賠償梗係無, 我地唯有折返hostel再作打算, 浪費左大半日時間，機場巴士講緊七，八十蚊一個人，車費都浪費晒。

第二日終於順利上機出發去Calafate, Calafate係位於Patagonia Area, Patagonia係著名行山天堂, 範圍好大, 橫誇阿根廷同智利架, 我地都係淺嘗呢一片行山天堂咋. 班機會係Ushuaia停站上客, 即係南美洲最南城市, 哈, 咁我地都叫到一到啦! 如果去South Pole, 就係Ushuaia出發架喇!好恨去呀! 不過旅行嘅時候, 一定要學識取捨, 始終我地都係一對草根backpacker, 今次未有budget去南極住啫.

到左Calafate, 市中心有好多Steak House, 呢度好出名食炭燒架, Discovery Channel都介紹過好多次, 我地第一晚隨便閒逛, 去Supermarket入貨, 準備第2日去Chalten. Steak House就之後先試, hostel有廚房就要煮喇! 餐餐出街食, 唔窮死都悶死, (之後旅程多得大少化身大廚銘, 廚藝仲不斷進步架)

當日我都就報定去行Glacier嘅tour, tour分左minitrekking, big ice, etc….我地揀左Minitrekking, 即係體驗式咁行下個glacier, 而Big Ice就會行得深入D, 程度都難D, 大少為左遷就我, 都無可奈何咁去minitrekking個tour咋. 老實講, 係Calafate最主要都係要去Glacier, 之後都無乜特別地方好去.

由Chalten返來果晚, 我地就試左Steak House, 牛同羊都好食, 炭燒得好香, 份量都好多, 多到我地都食唔曬, 價錢好抵, 百幾蚊有一份牛or羊, 仲貪心叫左燒香腸, 好好食架, 想講汽水反而有D貴, 要十幾蚊支, (係南美食飯, 汽水比例上貴主糧好多好多), 來到點都要一試嘅, 之後打包左食剩嘅羊, 買左D包, 火腿, 芝士, 準備第二日glacier tour嘅lunch, tour係無包lunch架, 我地又怕去到捱貴嘢, 所以自備lunch box (之後證明係明智的，因為可以講係無嘢食你買).

終於來到期待已久嘅glacier, 一早出發, 坐左約兩個幾鐘車就到，其實早係三十幾年前，應該唔使點坐車就到，個Glacier越來越細，越縮越遠，唉，地球人真係要環保D，愛惜你地個家園，到左碼頭，轉程十零分鐘船，我同大少不顧寒風(真係凍到入骨)，死都企係船頭睇風景，因為越迫近，越震撼，D冰靚到好似有魔力咁，吸引住你。

到達個島上而未行冰川前，會有一個短短嘅Briefing，就係強調要環保，同行緊時，不要亂拋垃圾，要保護這片最親驗民，最易到達嘅Glacier。

正式行近個冰川喇，忽然大雪紛飛，我地即刻入個Tent度避一避，個Guide話Glacier嘅天氣好反覆，一時晴天，一時落雪，所以件外套最好係防風防水，咁就咩天氣都唔怕，雪停左，我地一行二十人就出去排隊著釘鞋，哈哈，我論盡豬就行得好慢，大少就一樣見步如飛囉。

行冰川真係有D難架，好講經驗，上都OK，落就驚驚，路只有一條，跟足個Guide嘅指示，你唔知邊個位D冰行得，有D冰薄到透明咁，折射出來嘅顏色係好靚，深藍，淺藍，湖水藍，D形狀不規則的，而一路睇冰川，睇極都好似"火焰雪山"，好想食呀！我地上上落落，個Guide都忍唔住要我行上前，我實在太慢同輪盡喇，中間個Guide帶我地睇一個好深嘅冰洞，大少第一個衝出去睇，個Guide都話個冰川地形千變萬化，冰洞又深，個顏色好靚，有機會都想試去BIG ICE個tour，哈哈。

全程大約行左個零兩個鐘，好開心呀! 其實唔會太攰但又可以體驗到冰川嘅壯觀，到達終點時，個Gudie會有個小小Surprise俾我地，即場整Whisky on Rock，D ICE係即刻𨮝架，佢地話無污染，好乾淨，所以D冰係用得嘅，慶祝完成之後，休息一下就坐船回程喇，大少又點會夠喉，可惜時間關係，我地只可以join mini－trekking。

返到間靚靚Hostel，對住個無敵靚view，hea到暈，我地就算煮飯食，都特別開心，個View係好舒服，又可以同D人吹吓水，旅行就係要咁啦！

離開前，我地行左去小鎮另一邊，有個湖，住左好多紅鶴，帶左三文治過去，一邊食一邊欣賞湖邊風光，輕輕鬆鬆渡過5天阿根廷南部之旅。

有些人可能好擔心中東嘅治安，又怕溝通唔到，但幾時做Backpacker都要有冒險精神架啦！同埋有少少冒險嘅旅程先正，不過安全係最重要，何況約旦都好著重旅遊業發展，佢地都會好保護遊客，不過我地當然會小心為上，什麼人都不可盡信。

一直都有個願望係去晒世界七大奇景，今次終於有機會KO多一個(仲差一個係墨西哥)，目的地就係Petra，人稱約旦迷城，老一輩嘅應該會諗起"奪寶奇兵"，後生嘅就一定記得"變形金剛"搵火種果度，果度俾人感覺好神秘，好似有好多秘密隱藏住，我當然一定要親身感受一下。

由約旦首都Amman出發，你可以揀旅遊大巴或者包車(包車就最好經Hostel或Hotel)，因為我地會先去Wadi Rum(約旦沙漠)過一晚，所以我地揀左包車，由Wadi Rum過Petra都係半個鐘至一個鐘，我地一早9點就到左Petra，開始我地一日嘅迷城小探險。

由visitor center開始，我個心都好緊張，因為怕見到時會失望嘛，你知電影往往會拍到好超現實架啦，初初的一段路就係一D藏左係岩石入面嘅Tomb(墳墓)，不是十分特別，但當你一開始見到The Siq嘅入口，果種探險feel就出來喇。

The Siq即係穿入迷城那一條長長窄窄的通道，不過其實一D都唔窄架，夠一架馬車經過，因為古時皇室人員點會行入去吖，而家都會有馬車不時走過接載遊客，有時都幾危險，你又顧慢慢影相，馬車又好似好趕咁，好易同好似差D撞到咁，要小心D。

係The Siq入面行，你會好似有D迷妄，條路彎彎曲曲，睇唔到盡頭，兩邊D岩壁好高，光線有時照到入來，有時照唔到會變得好暗，但這就是我想要看的和感受的。

嘩⋯⋯你只會嘩⋯⋯行到The Siq盡頭你就只會嘩⋯⋯

穿過The Siq，那個就是電影出現的鏡頭，我心情好激動架，因為想來好耐，感激大少會支持我，陪伴我，哈哈。

傳說中嘅迷城出現左喇，呢個位就係Petra嘅第一個Highlight － Treasury，好多人一諗起Petra就會諗起呢個畫面，太經典同深入民心，電影又好，旅遊節目又好，見過咁多次都仍然覺得好震憾，就係睇咁多次都只係係mon內面，而且親眼見，好開心呀！我諗我同大少大大話話都影左大半個鐘相，哈哈，到此一遊嘛。

原來呢個Treasury係得個門面，入面係無完成，遊人禁止進入架，因為種種原因(最大機會係無錢)，個皇帝係無再繼續起入去，唔講唔知(我地都係睇TLC先知)，Treasury係由頂開始，慢慢向下同向內咁𨮝，真係想像唔到要幾多人力物力先可以完成，你可以係兩邊隱約見到一級級，就係工匠嘅樓梯，一級一級向下鑿，原塊石由上而下，外到內咁鑿出來，十分利害！叫得七大奇景，點止得個Treasury，過左Treasury，正式進入古城範圍啦!

如果大家係行得慢又或者唔鍾意趕的話，我勸大家可以去兩日Petra，因為整個area真係好大，加上好曬，太陽好猛烈，一日行曬真係有D攰架，入到古城，裡面分左好多個Zone，行到最遠至少有2KM，你仲要預時間回頭呢，所以好好考慮自己體力。

城內建築都係一D玫瑰紅色岩石建築，有露天劇場，有祭壇，有修道院，每一處都好宏偉，色彩又靚，當你走上去祭壇高地時，係高處望，迷城真係好特別，因為你要加D想像，二千年前有這個規模，可想而知這裡有幾繁榮，結果又影左好一大堆相啦!

再講多D，水利工程都做得十分好，你諗下係個沙漠中間有個石城，水係不可缺少既資源！每當大雨，城中有類似集水槽的排水道把水引到儲水區，而且就算幾大雨都好，都會唔令到城內水浸！

行到下午4點，其實入面都有D嘢食賣，不過我地都係自己準備左乾糧，入面食物又貴又難食，唔食好過食，好快我地就開始回程，行番出Vistor Center都要成個幾兩個鐘頭架，所以要預番D時間走。總括來講，Petra係值得做世界七大之一，因為真係壯觀的和獨特的。

約左車返去Amman，講開架車就一肚火，初時佢只係想俾2個鐘我地行Petra，我地死都唔肯，唔理幾多錢都打俾Hostel個Guide理論，個司機先留到4點，佢梗係想早收工啦，我地唔會上當囉，之後佢好好態度咁，仲問我地第二日用唔用車，哈，用車都唔揀你啦! 有時候去到呢D比較古惑嘅國家，我地就要俾多少少時間做功課，搵D好評多D嘅travel agent，唔止時間，錢用左，但自己一肚子氣。

我都無辦法用文字形容呢個迷城嘅宏偉，只睇相，我諗網上有好多，只可以話俾大家知，呢度係值得你山長水遠，來到無啖好食嘅約旦一睹佢嘅風采，親身感受一下呢度有幾勁。

熊本可能不是日本最出名嘅旅遊地區，但熊本熊就可能係日本最受歡迎嘅吉祥物，果隻黑色大熊配兩個紅紅面珠，又真係幾可愛嘅，佩服日本好有心思每個地區都有自己嘅吉祥物來吸引遊客，每年仲攪吉祥物大賽，熊本熊都有羸過架。

位於九州嘅熊本，係去九州旅遊必到嘅地方，今次日本我地係自駕遊，所以感覺好方便，但其實我都想坐吓日本有名嘅火車架，熊本同阿蘇火山嘅觀光列車係好出名又好靚，或者將來有機會可以再來的話就坐啦！而家都係乖乖地做乘客先，日本自駕其實真係好容易，由於大少同我哥哥都係打日本game大，個GPS佢地好快上手，入日文地址都難佢地唔到，而且GPS個反應都好好，比韓國好很多啦！

我地一早由長畸開左兩個幾鐘車過來熊本，我地又係沿路D公路餐廳開餐，每次食親都唔會覺得失望，味道一定唔差，食店隔離仲一定有手信賣，當係臨離開果個縣最後買手信嘅機會，所以我地都好鍾意呢D公路休息站，公路上會有一D有刀刀叉叉嘅路牌來標示休息站就係附近，唔食嘢，當去吓洗手間都好，所以自駕時都要留意吓喇！

熊本城乃日本3大名城之一，同大阪城，名古屋城齊名，其他兩座就未去，但整係睇熊本城又真係幾滿意，自小睇日本卡通片大嘅香港人，十居其九對呢類古城外貌唔會陌生，因為好多卡通都出現過，不過第一次親眼睇同係現場，感覺真實好多，同好多古城一樣，熊本城都有外圍城墻，主城會係中央最高位置，我地由底慢慢向上行，你唔需要地圖都一定搵到架，一路行一路賞櫻，好快就到左熊本城中最重要嘅天守閣。

參觀完熊本城，我地去第二個景點－細川家刑部，細川家係三百幾年好威架，阿哥係熊本城城主，咁就送左好大塊地俾個細佬，細佬就起左呢個豪宅做茶屋，之後改左別墅，最後係做左宅邸，簡單D講，即係去參觀幾百年前嘅豪宅囉，去到要除鞋入內參觀，攪到真係去似去左人地屋企咁，感覺呢度度似卡通片D屋，不過大好幾倍，我地一路行一路會諗，古時D日本人係室內係咪唔會企起身，定係佢地真係好矮先，無間房大少可以企直，我就勉強可以企起身行，哈哈，不過呢度確實好舒服，每間房望到嘅園景都有用心安排，而且光線好自然，幾百年古宅來講，都無陰深嘅感覺，如果有時間，來呢度睇吓，叫做認識吓日本人舊時嘅建築都好呀！仲有好多影相位架。

果日見仲帶D時間，5點人地收工前，4點半趕入去－水前寺成趣園，又係細川家個阿哥城主建造嘅，都係三百幾年前，為左招呼客人飲茶吹水嘅地方，中央有個大水池，依呢個中心再加D山山石石，小橋流水，錦鋰一定要有啦！成件事好日本，悠悠閒閒咁，試想想係中國，會有幾多大叔，大嬸，攪到無晒mood扮上等人去欣賞呢D山山水水石石啦！約莫行左大半個鐘，人家關門，我地說閃人了。

日本九洲個行程以觀光，浸溫泉為主，行街shopping就得熊本呢一晚時間，我地黃昏時間開始即刻飛去－上通下通，行街食飯，一定要試當然就係熊本多蒜拉麵，個味道同其他九洲地區有分別架，我就唔太like蒜，但大少同我哥哥就覺得好正，食一碗係唔夠飽架。

係上通下通D舖頭都集中係度，藥妝，衫，鞋都有得行吓，不過真係唔太多，當然仲有夾公仔嘅舖頭，只要你一開始左，個哥仔就不停幫你，直到你夾到為止，果時你又唔好意思收手，用左幾多都唔記得，只係記得最後都夾左索柏先走人，都無所謂，來得日本，夾公仔都係要做吓嘅。

行完街就再食2輪晚飯，一碗麵真係填唔飽大少，我地揀左好耐，想食咖喱，食多碗拉麵定點好，最後因為有睇日劇嘅關係，就去左居酒屋嘅物體，食串燒，餃子，飲啤酒，因為果間食店夜左都好多人係度吹水，我地去感受吓當地人嘅生活嘛！