黃心遊世界中東篇 <約旦站- Petra>
有些人可能好擔心中東嘅治安，又怕溝通唔到，但幾時做Backpacker都要有冒險精神架啦！同埋有少少冒險嘅旅程先正，不過安全係最重要，何況約旦都好著重旅遊業發展，佢地都會好保護遊客，不過我地當然會小心為上，什麼人都不可盡信。
一直都有個願望係去晒世界七大奇景，今次終於有機會KO多一個(仲差一個係墨西哥)，目的地就係Petra，人稱約旦迷城，老一輩嘅應該會諗起"奪寶奇兵"，後生嘅就一定記得"變形金剛"搵火種果度，果度俾人感覺好神秘，好似有好多秘密隱藏住，我當然一定要親身感受一下。
由約旦首都Amman出發，你可以揀旅遊大巴或者包車(包車就最好經Hostel或Hotel)，因為我地會先去Wadi Rum(約旦沙漠)過一晚，所以我地揀左包車，由Wadi Rum過Petra都係半個鐘至一個鐘，我地一早9點就到左Petra，開始我地一日嘅迷城小探險。
 |
| 要50 JD 既入場費, 約五百蚊港幣 |
 |
| The Sig |
由visitor center開始，我個心都好緊張，因為怕見到時會失望嘛，你知電影往往會拍到好超現實架啦，初初的一段路就係一D藏左係岩石入面嘅Tomb(墳墓)，不是十分特別，但當你一開始見到The Siq嘅入口，果種探險feel就出來喇。
 |
| 早上行入去陽光真係好靚 |
The Siq即係穿入迷城那一條長長窄窄的通道，不過其實一D都唔窄架，夠一架馬車經過，因為古時皇室人員點會行入去吖，而家都會有馬車不時走過接載遊客，有時都幾危險，你又顧慢慢影相，馬車又好似好趕咁，好易同好似差D撞到咁，要小心D。
係The Siq入面行，你會好似有D迷妄，條路彎彎曲曲，睇唔到盡頭，兩邊D岩壁好高，光線有時照到入來，有時照唔到會變得好暗，但這就是我想要看的和感受的。
 |
| 一轉最後個灣時就會無啦啦出現係面前，我幻想唔係當年發現呢個城市既人有幾興奮 |
嘩⋯⋯你只會嘩⋯⋯行到The Siq盡頭你就只會嘩⋯⋯
穿過The Siq，那個就是電影出現的鏡頭，我心情好激動架，因為想來好耐，感激大少會支持我，陪伴我，哈哈。
傳說中嘅迷城出現左喇，呢個位就係Petra嘅第一個Highlight － Treasury，好多人一諗起Petra就會諗起呢個畫面，太經典同深入民心，電影又好，旅遊節目又好，見過咁多次都仍然覺得好震憾，就係睇咁多次都只係係mon內面，而且親眼見，好開心呀！我諗我同大少大大話話都影左大半個鐘相，哈哈，到此一遊嘛。
 |
| 你見到門口中間兩條柱有修復的痕跡？最初發現時就塌下來的。 |
原來呢個Treasury係得個門面，入面係無完成，遊人禁止進入架，因為種種原因(最大機會係無錢)，個皇帝係無再繼續起入去，唔講唔知(我地都係睇TLC先知)，Treasury係由頂開始，慢慢向下同向內咁𨮝，真係想像唔到要幾多人力物力先可以完成，你可以係兩邊隱約見到一級級，就係工匠嘅樓梯，一級一級向下鑿，原塊石由上而下，外到內咁鑿出來，十分利害！叫得七大奇景，點止得個Treasury，過左Treasury，正式進入古城範圍啦!
 |
| 相片中間一級級的凹槽便是工匠的樓梯，証明了整個Treasury 是由上已下咁鑿出來 |
如果大家係行得慢又或者唔鍾意趕的話，我勸大家可以去兩日Petra，因為整個area真係好大，加上好曬，太陽好猛烈，一日行曬真係有D攰架，入到古城，裡面分左好多個Zone，行到最遠至少有2KM，你仲要預時間回頭呢，所以好好考慮自己體力。
城內建築都係一D玫瑰紅色岩石建築，有露天劇場，有祭壇，有修道院，每一處都好宏偉，色彩又靚，當你走上去祭壇高地時，係高處望，迷城真係好特別，因為你要加D想像，二千年前有這個規模，可想而知這裡有幾繁榮，結果又影左好一大堆相啦!
再講多D，水利工程都做得十分好，你諗下係個沙漠中間有個石城，水係不可缺少既資源！每當大雨，城中有類似集水槽的排水道把水引到儲水區，而且就算幾大雨都好，都會唔令到城內水浸！
 |
| 另一個建築，同樣地係鑿出來！ |
 |
| 內部的城市，全部都用返當地既石頭鑿出來 |
 |
| 建築內部 |
行到下午4點，其實入面都有D嘢食賣，不過我地都係自己準備左乾糧，入面食物又貴又難食，唔食好過食，好快我地就開始回程，行番出Vistor Center都要成個幾兩個鐘頭架，所以要預番D時間走。總括來講，Petra係值得做世界七大之一，因為真係壯觀的和獨特的。
 |
| 石紋都好靚 |
約左車返去Amman，講開架車就一肚火，初時佢只係想俾2個鐘我地行Petra，我地死都唔肯，唔理幾多錢都打俾Hostel個Guide理論，個司機先留到4點，佢梗係想早收工啦，我地唔會上當囉，之後佢好好態度咁，仲問我地第二日用唔用車，哈，用車都唔揀你啦! 有時候去到呢D比較古惑嘅國家，我地就要俾多少少時間做功課，搵D好評多D嘅travel agent，唔止時間，錢用左，但自己一肚子氣。
我都無辦法用文字形容呢個迷城嘅宏偉，只睇相，我諗網上有好多，只可以話俾大家知，呢度係值得你山長水遠，來到無啖好食嘅約旦一睹佢嘅風采，親身感受一下呢度有幾勁。
