Puno係我在秘魯第一站，一大清早在巴士總站吃的那碗類似豬骨粥的東西，每一位當地人都食緊那款粥，溫暖又美味，旁邊的秘魯人好熱心幫我地叫嘢食，大家溝通不到，我地大家都只好指指劃劃，點解我會咁記得那碗粥，就同叉燒蛋飯道理一樣，辛苦了好耐之後食到的東西真係會特別美味。
 |
| 一早食粥的地方 |
話說我們離開智利Atacama，出發到Puno，旅行的其中一個意義，就是訓練你的應變能力，你的毅力，你的堅強，可能有人會問使唔使咁辛苦，但都係我地平時經常講的，每個人都可以選擇你的旅行模式，不要問，只要去就是了。
由智利Atacama坐一晚通宵巴士(12小時左右)到達邊境城市Arica ，再由邊境行左10分鐘去一個的士站，這些的士專門帶遊客過境，我同大少二人就夾了另外兩個人一齊併車過境啦，都仲算順順利利，的士送我地去到秘魯Tacna那邊的巴士總站，我地要買巴士飛去Puno啦，點知呢個巴士站最快出發去Puno的都要黃昏，我地只好坐的士去Tacna另一個巴士站看看有沒有早D出發的巴士(食粥的那個巴士站)，好彩都可以一個小時後出發，預計黃昏時候就到Puno，以為OK啦，點知那架巴士駛到Puno附近的一個城市，司機就話唔去Puno，我地嘈佢，嘈間巴士公司，個司機先開佢架私家車，以為佢載我地去Puno，哈哈，太天真，佢送我地去一個local巴士站，送我地上左架local巴士，沒有放行李位的local bus，我同大少攬住兩大兩小backpacks，一個hand carry袋，一個小suitcase(問題：究竟行李有幾重，點解我揹得起)，擠迫係兩個座位裡面，架local bus不時停上客落客，左兜右兜，滿車乘客望住我地兩個外星人，不過好多人都好友善話架車係會去Puno，成車都知我地去邊，真係過左4個鐘左右，我地終於到達Puno一個巴士站(問題：究竟去左幾多個巴士站？)，一架巴士嘅人都想搵的士，好彩我地都不是旅遊初哥，大少飛快搵的士，我一個人睇行李，最後有無驚無險終於去到hostel，歷時大約30小時的旅程可以稍稍休息一下(問題：究竟幾多程車？)，我寫俾大家知，不是想講我地幾捱得，幾勁，係想講一講旅途上係會有很多突發事情，冷靜D面對，總會到達目的地，之後你會發現你又長大了一點點，難忘的經歷又多一點點，有時不能怪我同大少好多嘢都覺得唔辛苦，只坐一，兩程車好，船好，飛機好，已經很不錯了。
兩個主要目的驅使我地去Puno，第一係經Puno去Cuzco，為我地MachuPichu之行準備，第二就係去Lake Titicaca(的的喀喀湖)，Titicaca係世界上最高海拔的適航湖，面積很大，由秘魯＆玻利維亞共同擁有(不知幾想偷渡去Bolivia，當年攞唔到visa)，湖上以人工Uros floating island最聞名於世，我地join左兩日一夜嘅local tour，不想趕頭趕命咁參觀，之前30小時之旅太攞命啦!
一早有人來hostel門口pick up我地，之後join埋附近酒店的遊客，車行約半小時就到了碼頭，有D小攤檔係度賣當地紀念品，我地買左水同少少零食就出發，Titicaca島上係無超級市場架，咁加加埋埋就成三十人出發，一起初航行無耐，好快就見到好多蘆葦草，我地上左船項睇風景，同其他人吹水，有D都會去Cuzco，有D已經去完Machu Pichu，有D由墨西哥來秘魯(恨屎我)，大家交流吓，好快好美麗嘅Titicaca風景就出現係我地眼前。
進入Uros floating island風景區(個名我作的)，已經有一隻蘆葦船在守候，歡迎我地隻船光臨，其實係收緊入場費囉，哈哈，人家都要搵食，之後我地被安排上一個floating island參觀，佢地講解吓點建造個island，教吓我地編織蘆葦，仲有俾佢地成日食嘅荀我地試，又係大少先會試啦！我睇吓好喇，個島其實好細，佢地一家幾口就係住係呢度，不過佢都坦白其實好多年輕人已經會搬去城市，唔再過湖上生活，最後就係買手工藝品時間，全部都係hand－made，你喜歡可幫襯，唔會強迫的，之後我地加錢坐蘆葦船(係要加錢去體驗，不過好似一，兩蚊美金)到達下一個floating island，第二個島就大少少，係用來攪party，佢地係度唱歌跳舞，參觀左一陣就去下一個目的地。
其實Titicaca湖上係有好多住人嘅島，我地去左其中一個島過夜，落船時，有好多當地婦女等我地，原來我地係去佢地屋企住，個guide幫我地分好屋，我地同一對芬蘭夫妻同屋，到左屋，佢地已經準備好午餐，係傳統秘魯菜，有段小插曲，就係同芬蘭夫妻傾計，影響左我地做一個十分重要的決定，就係一定要去Galapagos island，之前無想過去同去幾耐，而家就知道呢個決定無錯，錯嘅只係留得太短，哈哈。
午飯後，突然間做左運動時間，係廣場集合後開始上山，Titicaca已經位於海拔二千幾，係無心理準備情況下，我地慢慢上山到海拔四千米，第一次體驗高海拔行山，我就慢慢來，大少就覺得好易好輕鬆，不停來回走，話太耐無做運動，之前係Atacama已經適應左高海拔，我同大少都無高山反應，如果一來Puno就咁行山，真係驚驚地，上到山頂，可以眺望Titicaca嘅景色，仲話會望到Bolivia果邊，個guide講嘅，我地只有信，因為好難求證。
行完山之後，我地閒逛吓個島，一齊係廣場傾計，之後返屋企稍事休息，夜晚有舞會等緊我地呀！食左晚飯後，我地屋主開始同我地裝身，著左佢地方Titicaca民族服裝，準備去玩喇，我地摸黑去左間大石屋，裡面有live band，都係演奏緊秘魯傳統樂器，有啤酒汽水賣，當地人開始帶頭跳舞，我地屋主都好落力帶領我地跳，氣氛好好，好開心，你唔跳舞，又可以去屋外欣賞星空，同其他人傾計又得，隨你喜歡，好快就渡過了一個熱鬧的晚上。
第二日行程就參觀第四個島，之後就回程返Puno，兩日一夜行程都好充實，又可以有機會識朋友同跟當地人傾計，我地都覺得唔錯，只係稍嫌商業多左D，都明白嘅，這些人就是靠旅遊業維生嘛！
Puno旅程差不多完結，最後等坐車離開前，係無準備下俾我地遇到一個巡遊，係搬左教堂內個聖
壇出來巡遊，好多人圍觀，又有樂隊演奏，放煙砲等等，哈哈，真係估唔到。
曾經有一套災難電影，講述某個地方發生天災，即係地震，海嘯，世界就快末日，一班年青人係呢個城市走上走落，東奔西跑，因為呢個城市係山多地少，好多建築物都係依山而建，道路彎彎曲曲，又狹窄又複雜，所以走難都幾辛苦，已經忘記了電影名字(因為係爛片)，但對這個城市印象深刻，咪就係Valparaiso－瓦爾帕萊索。
未講Valparaiso有咩睇，有咩做，點去，只要一講計劃去Valparaiso，我地traveller之間討論的就是治安好差，如果一個人遊蕩，好大機會遇到賊仔，偷嘢還好，搶嘢就麻煩，不是誇張，途中結識到的一個香港女仔就在Valparaiso俾人在同一日打劫左兩次，一次搶相機，另一次係推跌佢再搶晒D 野。
所以係Santiago hostel會有好多單獨或者只係兩個人的traveller會相約一齊day trip去Valparaiso，咁代表大家對Valparaiso嘅治安問題好上心，而且大家都係走慣江湖嘅traveller，都對呢度咁有戒心，咁更加要去睇吓啦！
由Santiago－聖地牙哥坐個半鐘頭巴士就可到達Valparaiso，班次都好頻密，所以出發果朝先買飛都未遲，巴士直達Valparaiso巴士總站，你可以輕輕鬆鬆轉程市內巴士去市中心，巴士司機同居民都好熱心指示俾我地知，我諗果度遊客太多，而我地個樣一睇就知係遊客啦，我地係巴士總站買定點回程車飛，免得回程無位又或者等得太耐。
左手邊間屋企就係纜車站, 中間當然係樓梯
 |
| 纜車站 |
Valparaiso的Historic Quarters－歷史區已經列入世界文化遺產，我地一定要去睇睇，入左市中心立即搵上山嘅纜車，未到纜車站，已經上一大條長樓梯，所以真係要坐纜車上山，同埋架纜車係好有特色，係好密嘅民居中有條路軌，一架覽車好慢咁來來回回接載遊客，仲有安全起見，通常都唔recommend遊客穿梭上落山小路。記得條樓梯有好多爆左既玻璃樽，感覺上成日有人爆人樽咁，行行下又見到個阿婆指住我地部相機，示意叫我地收返埋，好似好危險性咁，但一向都抱住"係你就係你既心態"邊理得咁多呀！
 |
| 纜車內 |
上到山上參觀，可以欣賞到Valparaiso全景，五顏六色嘅屋仔，密密麻麻係山上，又真係幾有特色，加上係沿海城市，風景真係唔錯，呢度又稱小三藩市架，參觀完山頂，可以係山上閒逛，因為歷史區不是一楝，兩楝建築物，而係一個area，山上行又不用怕，因為遊客很多，路不是上下山的小路，行吓行吓到lunch time，我地揀左食法國餐，因為Valparaiso都出名食法國菜而lunch又平D，呢一餐價錢比平時lunch貴但都好抵食，水準都好好，我地都會建議俾其他人來Valparaiso可以食法國餐，食飽飽又通處逛逛，落山又坐覽車，現在都仲有8條行駛中嘅路線，所以不用走回頭路，不用到同一個站，睇睇地圖，係遊客區實搵到個覽車站嘅，之後坐市內巴士，好容易返到巴士總站。
對我同大少D行動派，行，食都可以快嘅traveller，去Valparaiso day trip都夠，但鍾意hea，最多行動半日就抖嘅人，Valparaiso都可以住兩晚，我地識人係到住左五日呢，總之按時間，隨心鍾意點安排都好，Valparaiso都值得到此一遊。
未去之前已經知道土耳其出名風景靚，而Pamukkale－棉花堡可以話係其中一個最出名的，所以去土耳其應該必到Pamukkale啦！土耳其這個國家地方好廣闊，要看你時間夠不夠，再選擇遊覽那幾個地方同用什麼交通工具，那一次土耳其trip，我們只去了最有名的Istanbul－伊斯坦堡，Cappadocia－卡帕多細亞，Pamukkale同Antalya－安塔利亞，用了最平的交通方法－坐巴士，係南美洲坐巴士坐到慣晒嘅我地當然不覺得土耳其巴士有問題啦！哈哈
我地由Cappadocia一早出發，到差不多黃昏就到Pamukkale，果次搵hostel都算有D印象，因為巴士只會係公路旁放低你，而公路旁有好幾個分岔口，靠hostel提供嘅地圖同我地無數搵hostel經驗，我地都要成大半個鐘時間先搵，Pamukkale不是城市，沒有清晰街道名，hostel又同民居無分別，所以有D心理準備要好好搵一搵，休息左一陣，我地就即刻出去睇吓周圍環境先，Pamukkale有一條大路，你沿住條大路好快就見到個所謂市中心，棉花堡入口就係附近，說到底，Pamukkale就係圍住棉花堡而生，這裡也只有棉花堡。
晚餐時，想找那間Pamukkale好有名的日本餐廳，因為真係日本人主理，而旅途上對中東"美食"真的怕怕了，好可惜，日本太太剛剛返日本探親，餐廳休息，如果有機會再去，都會想試試呢間日本餐廳，但係那個市中心不難找到其他餐廳醫肚，但價錢都不算抵，你還可以順便買定回程巴士票，咁時間就好預算D。
第二日正式開始遊覽棉花堡，這裡因為有潔白如雪的沉積岩形成一層層好像是城堡的地形而命名，不過曾經因為過度開發，棉花堡都變黃了，幸好土耳其政府醒覺，明白保育的重要性，棉花堡才得以回復舊觀，可惜面積也大幅減少，人總要犯同樣錯誤，唉。
進入棉花堡範圍，係需要除鞋，其實咁都幾好玩，溫泉水就這樣流過你雙腳，雖然有時岩石有點刺腳，但行行吓就會慣架喇，平時行石澗訓練有素，當然偶爾你會見到"某強國"人都係唔聽話，著涼鞋或堅持著那對肉色絲襪，棉花堡係咁出名的點名，佢地又點會唔出現吖，所以話最好一早開門襯旅行團未到就入場，享受一下寧靜而美麗的棉花堡。
雖然棉花堡因為旅遊人數太多造成破壞，而且水源又不足，已經開始慢慢褪色，但親眼看到這個由棉花打造的堡壘，都仍然覺得好靚，好吸引，好想知道當年初初興起這個景點時，棉花堡究竟可以靚成點，由門口慢慢走上山上，那一段路真係大把影相位，你又可以坐低慢慢欣賞，只有短短一，二百米路，行兩個鐘都得，真係好好hea架。
上到山頭，有一個羅馬遺址，話說當年，古羅馬人已經係度嘆世界，浸溫泉，遺址可觀性都不錯，邊休息邊影相，又幾好hea，hea下hea下，竟然有人sell我地玩Paragliding－滑翔傘，諗左幾秒，講左一陣價，即刻出發來個即興Paragliding，真係無諗過係棉花堡有得玩，由後門出去棉花堡，係無啦啦由後門走人，之後佢地會送番我地去後門入番場，不用浪費你的門票，係咪好神奇呢! 跟車去到另一個山頭，穿上裝備，簡單講極一吓，衝呀! 好快就飛上棉花堡上空，由高角度欣賞，棉花堡範圍其實不大，不過整個Pamukkale風景都幾靚，正，永遠上天下海都會為我地帶來無窮樂趣，價錢算好抵，大約一百美金一個人，加少少錢仲有相，呢D土砲攪手，經濟又實惠，我相信去市中心幫襯Paragliding，都好可能搵番呢一班人做，果度咁細，D人來來去去都得咁多，佢地應該識晒，最後我地睇埋日落先離開，日落都幾靚，講多無謂，睇吓D相，總之我地就過左一個開心又愉快嘅一日。
到第三日，走之前，我地又再入去棉花堡行，因為呢個地方確實無嘢做，除非你搵當地旅行社睇吓有咩local tour參加，但來得Pamukkale，咁我揀左再入棉花堡hea，入場費10歐，話貴唔貴，平又唔算，當保育費啦! 如果你俾多少少額外錢，裡面有個羅馬式溫泉池可以游水，我地就無游喇，整係坐係隔食burger，其實係怪怪地，好多人係度食嘢望住你，個池D水又不算清，又不算暖(我去時天氣仲係凍)，基於幾個理由，我地無落水，而水池都得幾個人。
最後想話睇相棉花堡係好靚，見到真身落差不算大，只係原來面積好細，不夠震撼我地囉，對土耳其這地方確實存在好大希望，所以可能令自己有小小失望啦!
第二天繼續坐Tuk Tuk出發遊覽吳哥窟，今日到戲肉了，看看聞名已久的大，小吳哥，即是走小圈，小圈包小吳哥，巴揚寺，巴芳寺，鬥象台，空中宮殿，12 生肖塔，茶膠寺，這樣已夠你花一整天時間遊覽，Tuk Tuk司機會放你係起點，再約定你幾個鐘後接你食lunch，因為境點與境點間距離係可步行的，咁你自己慢慢睇，慢慢走。
Lunch由司機帶路，食類似泰式炒粉麵，價錢一定貴少少，不過可以接受啦，佢地食飯會自己攪掂，不用操心，記得我請佢飲汽水，佢都留番俾屋企小朋友，最後一日我又將食唔晒嘅餅乾零食送俾佢，佢話小朋友都無機會食，今次一定會好開心，幸福真的要好好珍惜。
大，小吳哥固然十分壯觀，相信有留意旅遊的人，好多節目，遊記都會介紹，咁我都唔多講，但你記得要欣賞的是整個吳哥建築群，要歷時多久才能完成，人類又用多久就把它們遺忘。
要看吳哥窟的宏偉和精心建築，可以從石與石之間的緊密接合來見證，大部分石層堆疊出來都不需要使用任何東西黏合，單靠精密計算和咬合把石塊層層堆起，你會在遺址偶然自到在維修的部分，每塊大石都需要編號，因為石塊的位置是必須跟原本一樣，只是後期我們需要水泥再修復，這些維修過程花費龐大又需時，但柬埔寨政府經費不足，所以有其他國家幫助復修這個世界聞名的高棉經典建築群。
如果對建築有興趣，大，小吳哥的石門，石窗，門楣，山牆、塔門，迴廊和長廊都能深深吸引你的，每個建築物都是滿清的浮雕壁畫，要細心欣賞的話，你可能真的需要買七天的門票，當中的對稱設計又是一個令人讚嘆的地方，另一經典又包括吳哥窟的微笑，那些人面浮雕，所以吳哥窟是需要用心慢慢欣賞的。
時不時都會係不同寺廟見到著橙色衫嘅憎侶係度，我地同左幾個傾計，原來佢地真係由其他地方，例如緬甸，寮國來柬埔寨學佛，但有一些當地僧侶專門出來俾攝影師影相，以賺取外快，國家窮，所以千方百計增加收入，另外亦有著高棉傳統服裝嘅女可以邊跳舞邊影相，當然係額外收費啦！這些都是打正旗號做生意，但有時影到當地小朋友，可能佢地都要你俾額外小費，我地會建議你定一些文具俾小朋友，糖果可能影響佢地牙齒，而佢地又不會護齒，可能反而害了他們，直接俾錢又助長小朋友不上學，經常流連各大景點賺外快的心態，錢可以直接捐一些幫助柬埔寨的慈善機構，都一樣能夠幫助當地小朋友。
最後一天在柬埔寨，我們就遊覽了外圈，重點在於女皇宮(Banteay Srei)，女皇宮面積其實不太，但有別於其他吳哥寺廟，這裡是供奉印度教的濕婆神，加上大部分是由粉紅色的玫瑰砂岩，所以觀看價值很高，而且這裡的雕塑可算是寺廟中最出色的，我們怎可以錯過呢，作為吳哥窟的終結也很稱職。
其實除了遊覽吳哥建築外，你可以到洞里薩湖的水上市場參觀，也可以安排日出時分坐熱氣球欣賞高空下的吳哥窟，行程有很多選擇，只怕時間不夠，像我們一樣，短短幾天又要離開，坐巴士回到曼谷。
我不能單靠一篇遊記就讓你知道吳哥窟精彩之處，你需要親身感受，再慢慢發掘這個就在香港不遠處的國家的美麗，不要只看相，起行吧！
