話說去到伊東個碼頭，見到水好清澈，有好多魚仔，玥小姐係度睇吓魚仔，又追海鷗咁，行吓行吓，有人sell你坐船出海，隻船係有地下一層俾你睇魚嘅。
我地考慮左一陣，為左俾玥小姐睇吓魚，餵吓海鷗，竟然真係坐玻璃船出海睇魚，我心理關口好難先過得到，個船係兜一個圈，出到島之後回頭，約45分鐘，盛惠每人¥1600，只收現金。
果然係船倉玻璃窗見到好多魚仔，玥小姐亦好興奮，可惜只有開船前同泊岸先係碼頭見到魚，出左海，船一路開，只有泡同泡。所以開船後，我地上左最上層玩雀。如果出到海停一停船，俾我地睇多次魚魚就好啦！
BTW，全程有導遊"日文"介紹，唔該曬！
暑假去左沖繩一轉，食左好多好野呀！我哋香港好多人鍾意食日本菜，我都預左日本係無嘢唔好食，但今次旅程問"點解嘅？點解咁好食嘅""好好味呀!食唔番點算"的次數係幾乎每一餐都發生，而且又係因為Yen平，每餐飯價錢好似有6折咁，真係做到平靚正! 諗起都好味呀！慢慢介紹一下我哋食過乜啦！
通堂拉麵
是清淡豬骨湯底，味道不是濃湯咁重，但都係好好味，麵係彈牙，都值得一食，下次要試埋暖慕拉麵比較下。
五苑燒肉放題
約HKD150食盡豬，牛，雞的不同部位，而且味道都好好，日本很難找到難食的，每種牛，豬你都可以食出不同肉質，不同味道，有得飲有得食，正!
和琉Agu豬火鍋
喜出望外的一餐，潛水教練極力推介，一個set 3500yen，由頭盤到主菜無一道係唔好吃，兼且好地道的琉球風味，海葡萄做沙律比整係海葡萄出色很多，豆腐味道好正，同埋點解可以做到彈牙？
當然主菜豬肉火鍋配大量蒽，入口好濃嘅豬肉香，只係用清水湯底，豬肉都可以咁甜，咁香，真係意想不到，點解可以咁好味？而且價錢真係好抵呀，由頭到尾有6／7道菜，個沖繩飯係超級好食，係食唔停，呢一餐真係食到個個都大滿足。強烈推介，超級好味！！！！必食呀！多謝潛水教練話我地知！！
Aeon mall rycom － IKINARI STEAK
又係價錢問題，百零蚊食到呢個質素嘅牛扒係超抵，我地揀左最貴國產牛，Well done真係煮到剛剛好，食左塊200G做早餐，好過份囉。
Aeon mall rycom － Manoa Pancake
無得輸的飯後甜品，菠蘿pancake，新鮮cream不甜而香滑，以為食幾多都唔會肥，哈哈，一個人食晒3塊都得，諗起都流口水。
グルメ迴轉壽司
必食吞拿魚，牛肉刺身壽司，價錢非常平民化，口味一定比香港選擇多，我地膽粗粗叫是日special，係沖繩當日捉到嘅魚獲，新鮮就一定oishi啦! グルメ迴轉壽司分店好多，如果自駕遊，GPS都可以search邊間分店最近你，好方便架，可惜10:30pm關門早左少少，不過香港人先會不會不停想用盡24小時，夜D可以當宵夜就仲正。
沖繩麥當勞
因為早餐有Mcgriddle，即係兩塊內含糖漿嘅熱香餅包住豬柳蛋OR煙肉蛋，味道甜中帶咸，我就幾鍾意，所以點都食番個，香港無吖嘛。
浜之家
回程前一晚去大吃大喝，海膽焗龍蝦，海膽焗青口，炸蝦，炸蠔，海鮮鍋，美食不能盡錄，我地一行6人，一人一個set，再叫刺身船，天婦羅，其他嘢食share，真係好飽，又因為yen平，所以價錢抵到喊，每位都盡情食呀！
沖繩麵，沖繩菠蘿
一定要試沖繩麵，根夢係最好食，入口即溶豬軟骨，好清的湯底。
菠蘿係的其中一種喜愛的水果，沖繩菠蘿係好清甜，又不能錯過的。
總括，日本有咩唔好食(除左唯一一餐之外)，我地今趟可以講得無餓過同樣樣都令人食過番尋味。
今次短短幾日，我地都轉場，因為想住的apartment不是全部日子available，得兩晚都照殺，因為一班人一齊住係好開心，好有旅行feel，今次入住一間日式平房，真係一間日本平民住嘅屋，浴室一定有浸浴架，同埋屋主好親切，英文幾唔好都盡力招呼你，又帶welcome fruit＆welcome tea，好有住家feel，一班朋友一齊住吓，笑吓，爽呀！
 |
| Airbnb book 的apartment |
另外住左北小小嘅酒店，對正萬座毛，舒舒服服咁，個私人沙灘尚可，泳池一般，不過房間同服務都好好，個人只會係去陽光與海灘嘅地方先叫做鍾意住酒店，全因為方便，留晒時間盡情去玩。
係yen平的時候，沖繩可能抵過泰國，印尼D渡假聖地，咁係好難抗拒去日本旅行嘅，而自駕遊沖繩係可以讓你盡情吃喝玩樂，有機會一定來多一round，哈哈。
很多人到過沖繩，但當日元跌到1港元對6.2日元時，可能你會體驗到更多姿多采的沖繩。而且去沖繩旅遊必須揀可以落水的季節才有意思的，因為沖繩美麗的海洋世界就是它其中一個最大賣點，千萬不要錯過呢！
潛水之體驗
第一次係日本潛水，教練的認真程度已比其他東南亞國家出色很多，出發前已約定5個人潛水，三個係scuba diver，兩個係試fun dive，來回幾次e-mail問清楚身高，體重，詳細講解當日行程同安排，到左當日又不會隨隨便便就落水，要自己set好裝備，每個步驟同你review，如果係菲X賓，幫你整定，快D落水，快D散水啦！而初次fun dive嘅朋友，教練好細心講解，落著水又慢慢俾時間你適應，想當年我fun dive，二話不說就放晒你D氣，即刻沉你落水底，嚇死人。
一早係apartment 附近既便利店到等，買個便當，便坐船出發去慶良間群島(Kerama Island )，沖繩慶良間群島海底可能不是我見過最厲害的，但水都係清澈的，很多種小魚同珊瑚，仲有好幸運地一落水y就見到海龜，令人精神一振的時。教練帶領我地潛入一條窄窄的海溝，好似一個海入邊既山谷，我地就好似係個山谷中間度飛咁，那種感覺是完全不一樣，小心奕奕地去欣賞，一次全新體驗，不過沖繩都有一定水流，游到都好累，但當然是十分十分值得的。
一日三次dive都係20000yen，即HKD1240，價錢真係好抵玩，因為教練本身好喜歡水底攝影，所以幫我地影左好多靚相，最重要係不另收費，全部相可以download，即日有得睇，佢其實係唔需要咁做，呢D真係窩心的，以前我跟過那些diving好，snorkling好，你想要相就加錢啦。所以話今次係沖繩潛水的滿意度係爆分，一定會再回來潛水。
 |
| 窄窄的海溝 |
下次會介紹下陸地上有乜玩，記得留意我地既更新啦！
熊本可能不是日本最出名嘅旅遊地區，但熊本熊就可能係日本最受歡迎嘅吉祥物，果隻黑色大熊配兩個紅紅面珠，又真係幾可愛嘅，佩服日本好有心思每個地區都有自己嘅吉祥物來吸引遊客，每年仲攪吉祥物大賽，熊本熊都有羸過架。
位於九州嘅熊本，係去九州旅遊必到嘅地方，今次日本我地係自駕遊，所以感覺好方便，但其實我都想坐吓日本有名嘅火車架，熊本同阿蘇火山嘅觀光列車係好出名又好靚，或者將來有機會可以再來的話就坐啦！而家都係乖乖地做乘客先，日本自駕其實真係好容易，由於大少同我哥哥都係打日本game大，個GPS佢地好快上手，入日文地址都難佢地唔到，而且GPS個反應都好好，比韓國好很多啦！
 |
| 係熊本住既hostel |
 |
| 除左住之外，間hostel 仲有染布Workshop玩 |
我地一早由長畸開左兩個幾鐘車過來熊本，我地又係沿路D公路餐廳開餐，每次食親都唔會覺得失望，味道一定唔差，食店隔離仲一定有手信賣，當係臨離開果個縣最後買手信嘅機會，所以我地都好鍾意呢D公路休息站，公路上會有一D有刀刀叉叉嘅路牌來標示休息站就係附近，唔食嘢，當去吓洗手間都好，所以自駕時都要留意吓喇！
好快就搵到間民宿，今次間民宿好大，我地住8人房，結果得我地一行3人住晒，每個床位都有屏風間開，好日本風，咁一早放低晒D行李，我地就即刻出發去熊本第一大景點－熊本城，哈哈，先唔講熊本城點，3月尾竟然執到少少櫻花水尾，仲見到好多學生仔係度寫生，好多本地人野餐架，一早就有好開始，真開心。
櫻花加上熊本城，好日本呢
熊本城乃日本3大名城之一，同大阪城，名古屋城齊名，其他兩座就未去，但整係睇熊本城又真係幾滿意，自小睇日本卡通片大嘅香港人，十居其九對呢類古城外貌唔會陌生，因為好多卡通都出現過，不過第一次親眼睇同係現場，感覺真實好多，同好多古城一樣，熊本城都有外圍城墻，主城會係中央最高位置，我地由底慢慢向上行，你唔需要地圖都一定搵到架，一路行一路賞櫻，好快就到左熊本城中最重要嘅天守閣。
 |
天守閣望出去
|
天守閣內展覽左好多加藤清正時期的歷史資料，武器等等。而上到最高樓層，可以欣賞一下熊本城四面嘅風景，從高處望又另一番感覺，我地都差不多抖留左成個鐘，因為要慢慢拾級而上，返回天守閣門口，俾我地遇到有D人扮將軍同著和服，遊客可以排隊影張相，哈哈，我地都有影，反正到此一遊，唔好浪費吖嘛！
 |
| 細川家刑部 |
參觀完熊本城，我地去第二個景點－細川家刑部，細川家係三百幾年好威架，阿哥係熊本城城主，咁就送左好大塊地俾個細佬，細佬就起左呢個豪宅做茶屋，之後改左別墅，最後係做左宅邸，簡單D講，即係去參觀幾百年前嘅豪宅囉，去到要除鞋入內參觀，攪到真係去似去左人地屋企咁，感覺呢度度似卡通片D屋，不過大好幾倍，我地一路行一路會諗，古時D日本人係室內係咪唔會企起身，定係佢地真係好矮先，無間房大少可以企直，我就勉強可以企起身行，哈哈，不過呢度確實好舒服，每間房望到嘅園景都有用心安排，而且光線好自然，幾百年古宅來講，都無陰深嘅感覺，如果有時間，來呢度睇吓，叫做認識吓日本人舊時嘅建築都好呀！仲有好多影相位架。
 |
| 每一個框望出去都好似幅畫 |
果日見仲帶D時間，5點人地收工前，4點半趕入去－水前寺成趣園，又係細川家個阿哥城主建造嘅，都係三百幾年前，為左招呼客人飲茶吹水嘅地方，中央有個大水池，依呢個中心再加D山山石石，小橋流水，錦鋰一定要有啦！成件事好日本，悠悠閒閒咁，試想想係中國，會有幾多大叔，大嬸，攪到無晒mood扮上等人去欣賞呢D山山水水石石啦！約莫行左大半個鐘，人家關門，我地說閃人了。
 |
| 水前寺成趣園
|
日本九洲個行程以觀光，浸溫泉為主，行街shopping就得熊本呢一晚時間，我地黃昏時間開始即刻飛去－上通下通，行街食飯，一定要試當然就係熊本多蒜拉麵，個味道同其他九洲地區有分別架，我就唔太like蒜，但大少同我哥哥就覺得好正，食一碗係唔夠飽架。
係上通下通D舖頭都集中係度，藥妝，衫，鞋都有得行吓，不過真係唔太多，當然仲有夾公仔嘅舖頭，只要你一開始左，個哥仔就不停幫你，直到你夾到為止，果時你又唔好意思收手，用左幾多都唔記得，只係記得最後都夾左索柏先走人，都無所謂，來得日本，夾公仔都係要做吓嘅。
 |
| 好好味既九洲拉麵 |
行完街就再食2輪晚飯，一碗麵真係填唔飽大少，我地揀左好耐，想食咖喱，食多碗拉麵定點好，最後因為有睇日劇嘅關係，就去左居酒屋嘅物體，食串燒，餃子，飲啤酒，因為果間食店夜左都好多人係度吹水，我地去感受吓當地人嘅生活嘛！
熊本確實有好多有歷史價值嘅地方去，算做可以了解下日本古時文化囉，而自然觀光仲有阿蘇火山，另一篇先講，所以抵熊本可以係芸芸日本城市中，近年越來越多人去。
