《黃心三人遊世界,今次趕上潮流---Glamping去》

1:06:00 AM Yellowsumtravel 0 Comments


<點解揀Glamping先,why?why?why?>
來緊6月尾,其實係後日會同玥小姐去外地露營,第一次同佢挑戰三日兩夜,好期待。。。
準備期間諗返起係Adelaide去三日兩夜Glamping嘅快樂時光,Glamping係"glamorous camping"嘅縮寫,指讓人驚艷嘅野營,豪華的,輕鬆的,舒適的親親大自然,外國已經流行一陣子,香港最近好似好興(當然係香港我地都係like wild camping啦),說真的,外國地方大,好多campsite,national park揸車就到,又有地方起d fix嘅屋呀,帳幕呀,廁所呀,咁真係可以舒舒服服輕輕鬆鬆咁就話去露營囉。
之前無諗過去Adelaide會Glamping,但今次係當地朋友安排,佢考慮到我地有兩個BB(一歲和半歲),而且我地又唔方便帶自己嘅camping裝備,所以佢揀左係Deep Greek Conservation Park租間五藏俱全嘅靚屋。



<南澳保育區,自由自在嘅袋鼠地>
先介紹一下Deep Greek Conservation Park,位於Delamere,對面就係著名嘅Kangaroo Island,係南澳一大片保育區,係Adelaide揸個幾鐘車就到,內面有唔同住宿選擇,除左租間靚屋,一樣有camp site提供,你可以租個位camping。公園裡面有好多野生動物,一定有嘅係野生袋鼠啦!袋鼠大概聚居公園裡某幾個位置,你一定可以成功搵到佢地,放心,真係易過係動物園見袋鼠,而且d袋鼠係活潑亂跳,會望住你,又會對打,而且你會見到好多family走埋一齊,不是動物園可比。

仲有,公園內有成百種雀鳥俾你追蹤(我地隔離屋對老夫婦就係來觀鳥),另外,可以揸車去最篤篤嘅崖邊欣賞南澳嘅海岸線,再行落去沙灘仔玩吓沙。留意番園區好多路線要四驅車先可以行駛,所以我哋個朋友為咗方便喺澳洲自駕遊,就買咗架二手四驅車,揸四驅車喺似探險多d嘅,哈哈。



<Glamping住乜?食乜?>
講返今次Glamping住間屋,基本上間屋呢就有齊客廳,飯廳,open kitchen,兩間房同一個大浴室,兩間房嘅距離有一條走廊,所以兩個family入住,BB喊都唔太會嘈到對方,有足夠私人空間,全屋透光範圍好多,自然光入屋令人感到非常寫意。
最開心有一個真。火爐,男士們見到個爐雙眼發光,起爐火,扔木頭對佢地都係一大娛樂。對我哋呢啲住係窩居嘅香港人來講,住一間有火爐嘅屋,就算一晚兩晚都係一件好幸福嘅事。



至於食方面,廚房內基本廚具餐具都齊,朋友就係屋企帶多咗好多調味料,同埋焗盆,咖啡壺,住宿係包早餐嘅,所以會有搽麵包嘅牛油同果醬,幾款Cereal俾你揀,如果唔嫌簡單,真係早餐都唔使買。
我地係超級市場入滿貨,要準備午餐,煮晚餐嘅食材,仲有零食呀!飲品呀!外國地方,一間大超級市場基本上都可以買齊所有嘢,我仲突登買左新鮮三文魚同牛奶俾玥小姐,三文魚產地梗係澳洲,價錢又平,而牛奶梗係來自Adelaide嘅牧場,好新鮮,玥小姐一歲後第一次飲嘅就係澳洲牛奶,哈哈,所以準備小朋友食物,係澳洲旅遊係完全不成問題,仲有澳洲食品下下都係有機,健康又美味。
我地午餐基本上都跟住外國人嘅步伐,食三文治,食批,食沙律,不會大吃大喝,到晚餐係屋仔先會炮製大餐,冇理由有個咁靚嘅open kitchen都唔用。



<Wild life係唔使準備做乜㗎!>
三日兩夜嘅節目就係揸車睇動物,睇風景。
---梗係有睇袋鼠啦!
出門尋找"隱世"野生袋鼠,比起野生樹熊,袋鼠確實隱藏不了,開車到佢地聚居嘅area,你張開眼看就是了,可能袋鼠體積傍大,而且跳嘅時候十幾尺高,非常易搵,落車慢慢行埋去睇都得,不過動作要慢d,靜d,(我地得到土生土長澳洲人指示先敢咋)。

---睇日落,睇星星係露營指定動作啩!
香港個天得豆腐潤咁細,去到出名天氣好嘅澳洲,唔睇日出,日落,星星就浪費啦!有小朋友嘅人就知睇日出有些難度,哈哈。日落就啱數d,之後返屋晚飯,好自在寫意。




---去沙灘玩沙囉!
澳洲出名沙灘多,但唔係個個都可以隨意游水,有d有鯊魚出沒,有d就適合滑浪,同埋因爲水流關係,可能d水係凍入心。但玩沙就幾時都適合,一邊野餐,小朋友一邊玩沙,吹吹海風,外國生活節奏就係咁上下啦!



---數星星,一顆兩顆三顆連成綫
尋找傳說嘅銀河,計啱時間外出觀星,因為無光害,就咁行出間屋已經滿天繁星,對澳洲朋友,見慣左,但我地同玥玥都無錯過數星星嘅機會,當然繼非洲之後,再一次睇到銀河,我諗起"The Guardian of Galaxy"。


<真正enjoy life>
旅行有時就係為左過一些平常不會過的生活,漫活對我地係奢侈品,三日兩夜總算負擔得起,早上一杯咖啡,看看窗外風光,之後外出走走,欣賞風景,追逐動物,晚上看著火爐加一杯熱朱古力,無電視,無上網,兩個家庭傾吓旅遊經,仔女經,工作,生活,英文雖爛但交出真心,無想過十年前旅行識嘅外國朋友會做了一輩子好友,感恩。


<Glamping試後感>
我個人都好喜歡Glamping,一天在外享受野外活動,但又有個安樂窩給你晚上談天說地,hea休息,感覺好寫意。
但係大少就比較偏好wild camp啦!不過佢都同意天氣凍,有小朋友一齊,咁就梗係Glamping啦!