黃心遊世界西歐篇 <德國LEGOLAND>

11:00:00 PM Unknown 0 Comments



老實說,我都幾鍾意那次德國之旅呢,德國係一個好整潔的國家,交通方便,景點又多元化嘛!睇車啦!睇波啦!城堡啦!就連主題樂園同教堂都有,實有一樣滿足到你啦!




呢隻馬仔真係好想坐
因為我都未試過係歐洲去主題樂園,由Munich坐約兩個鐘火車就會到達德國的Legoland,我梗係試一試啦!雖然近近地馬來西亞都有Legoland,但天氣熱吖嘛,去樂園玩,天氣都好有關係,大熱太曬會好攰,好無心機!其實都未去過馬來西亞個Legoland,唔知果度點環境,德國的Legoland就唔算好大,我地安排入住Legoland resort一晚,玩就玩盡D,先講酒店,每間房都有一個主題,我地住嘅係海盜房,門口會有隻海盜船遊樂場,有小朋友應該超正,餐廳外仲有大型繩網,公園等設施,真係適合小朋友。

講番個樂園,遊人不算多,每樣遊戲都唔係點使排隊,食嘢又無人爭,舒舒服服玩兩日一夜,真心講外國人普遍好nice,無論玩,睇,食都好有秩序,完全唔會有勞氣的機會。仲有一個機動遊戲係德國Legoland 先有,係教小朋友認識流體力學!玩法好似海洋公園個衝天飛鷹咁,但隻翼係用自己對手去控制,咁就可以控制到高低到轉動!若果你有膽色同明白整個原理,可以學下大少佢玩到成架飛機掉轉左。佢痴嫁!
大少佢真係痴嫁
瑞士Luzern
新天鵝堡
威尼斯



另外樂園內都有好多Lego 砌成的場景,好似拜仁慕尼黑個主場啦,歐洲各國景色同埋大量星戰既場景呀!仲有個工場教育D 小朋友Lego 係點做既,整個Legoland 細細地既樂園但好好玩!






遊覽完Munich,下一站係去Amsterdam,而因為順路,離開Legoland當日,我地選擇停一停Köln(科隆),過一晚夜,科隆係德國第四大城市,我識好多歐洲城市名都係拜睇足球所賜,哈哈,科隆除左教堂出名,啤酒都好有名,仲係古龍水發源地,可惜我地只係路過,唔夠時間遊覽,就只好襯第二朝少少時間去左歐洲三大宗教建築之一-科隆大教堂,其餘兩個包括巴黎聖母院、羅馬聖彼得大教堂。um….咁個教堂有幾壯觀,就我嘅筆墨難以形容,不過整係講大小,係一定無聖彼得大教堂咁大,外形咁宏偉,但內部每個部分建築都好講究而且有特色,可惜我地宗教知識貧乏,不能了解每個地方的意義,不過至少知道科隆大教堂有一聖物好勁,就係從東方去朝拜初生耶穌的「東方三博士」的聖龕,2015年歷史,對基督教意義深厚,咁經過Köln一定要去參觀這所教堂,而且教堂位於火車站旁,交通方便得不得了,我地參觀完教堂就隨即坐火車去Amsterdam。


科隆大教堂

黃心遊世界西歐篇 <德國站- 慕尼黑>

9:11:00 PM Unknown 0 Comments


BMW Museum

Munich(慕尼黑)一個充滿近代歷史價值的地方,先唔講歷史,講足球嘅,拜仁慕尼黑應該無人不認識啦!很遺憾我在Munich的時候,因為不想炒黃牛而錯過了拜仁慕尼黑的主場球賽,真的每每想起這事都覺得很可惜。我應承自己如果再到英國,德國,西班牙,我一定夾好時間買飛睇球賽啦!外國睇波,氣氛係好正架!我們由捷克布拉格出發到Munich,今次專登揀坐巴士,因為德國巴士時速可以達到每小時300公里以上,而且出名舒適又快又安全,無理由唔試吓嘅,果然沒有令我們失望,真的準時又自在,我同大少暗暗同南美坐巴士比較,真係差幾個level兼落後好幾年,但價錢當然歐洲貴D啦!不過一分錢一分貨嘛!德國人給人印象是工作認真,做事乾淨利落,有規有矩,你到德國旅遊你都一定感受得到,先到hostel放低行李同check-in,reception朋友好專業解釋hostel要有的規矩,要注意整潔免得影響他人,我地入住6人房,每個人有locker,床位有簾,差電位,小床燈,你可以有自己空間,感覺比其他地方hostel的管理更好一點,不過就少了一份人情味,跟我認識德國人工作的態度一樣,認真而有效率。Munich的景點有很多選擇,如果喜歡Bauhaus式建築文格的,一定可以滿足你,而今次我係第一次到Munich,但大少就第二次,所以揀去邊都有D爭論,要平衡兩個人的需要嘛,有時出現呢類情況,通常大少都不介意重遊某些重要景點,有D真係無聊佢會出聲,正面D睇,這樣都可以幫我慳番唔少時間,但內心其實好唔妥佢一世都去多我幾個地方。

先講講大家都第一次去的景點,BMW(寶馬)博物館,雖然我地唔係車迷,但見到mini cooper咁cutie都唔會唔like,先睇博物館外形都夠殺啦! 仲要我地咁啱免費入場,因為某人用BMW電單車橫越左非洲嘅記招,所以免費開放俾大家來贈慶,講得係博物館,由陳年舊型號同concept car都應有準有,就算唔識車都好快變知少少,可消磨大概兩小時或以上,因為你可以去埋隔離BMW展覽廳,睇同試坐新車,又可以行sovenior shop,零消費就可以玩一個下午,好抵呀!而且環境都好舒適,附近有埋大公園可以hea。








BMW Museum
其實去BMW之前,我同大少有去慕尼黑安聯競技場碰碰運氣,就算入唔到場睇波,都可以感受吓個氣氛吖,安聯競技場外牆由二千幾個氣墊做成,有千幾個氣墊係可以發光,咁拜仁主場嘅時就亮紅燈,慕尼黑1860主場時就亮藍燈,唔係兩隊主場但有其他呢,就著白燈囉,如果當參觀一個建築物,一個地標都OK嘅,有球賽嘅氣氛真係好熱鬧,坐緊火車去,已經有好多球迷係度唱歌,個個都著晒拜仁嘅衫,帶晒頸巾,真係好可惜好可惜無入場睇,下次唔可以俾呢件事發生,一定唔可以。





話說我同大少係德國好似晚晚都去左beer garden開餐,拜仁羸波之後果晚,beer garden嘅人high到暈,又不停係度唱拜仁會歌,我點知?因為有個大叔見我地咁生面口,吹吓水,佢係拜仁忠實fans,教我地唱歌,一齊跳舞,又問我地點解飲得一杯啤酒,係咪唔鍾意,但德國啤酒一杯1L,佢地吓吓飲足一晚,點比先。咁最有名嘅beer garden之一,應該係HB啦!豬手係好食嘅,去德國一定要試試。




講左咁多現代嘢,係歐洲是但一個國家,都一定有D古蹟,閒閒地幾百年,係Munich出發,當然最興係去"新天鵝堡"啦!新天鵝堡,細細個睇卡通片既城堡就係咁既樣,連迪士尼個睡公主城堡都參考左佢,到大左先知原來世上絕少城堡係咁既樣。一般遊人都會從慕尼黑坐火車到Fussen,再轉巴士來一個簡單的Day Trip。但其實它的後山有好多好靚同好舒服既山俓,如你去新天鵝堡,我十分建議你可在Fussen 留多幾天,行下山,係湖邊休息下,享受下德國既郊外,BTW,其實有個"舊天鵝堡"架,不過day trip都未必夠時間去埋,要睇時間,因為又要夾好火車時間返Munich。


新天鵝堡


咁德國又點止Munich呢,我想我一定會再到呢個國家旅遊嘅。因為歷史背景吸引,建築風格獨特,現代科技發達,歐洲旅遊好選擇呀!

黃心遊世界陽光與海灘篇-Saipan塞班島下

10:59:00 PM Unknown 0 Comments




在塞班的第三日,嘆完早餐,仲攞定少少麵包,就出發去軍艦島,點解果度叫軍艦島,係因為當年打仗時,個島外形似軍艦,敵軍誤會而砲轟呢個小島,所以之後當地人都會叫呢度做軍艦島,即係Managaha Island,塞班必去景點之一,島好細,廿分鐘可以環繞一圈,但風景咁靚,整係影相都唔止廿分鐘啦!而且係呢度沙灘邊snorkeling係另一個世界,水清見底,各種魚都好多,有D有成尺咁大條,沙灘邊都見到,超超超正,因為沙灘邊較淺水,好多家長都拖埋D小朋友一切浮潛,輕輕浸塊面入水都睇到好多熱帶魚,大人細路都好happy。將來我都要帶小朋友去陽光與海灘,同魚仔玩。

軍艦島
仍然都係魚多過人
軍艦島tour好快就完左,係島食埋agency準備嘅light lunch,始終成日會浸住水,食太多食物會"浪"住個胃,之後係沙灘hea下,因為之前俾人撩左玩水上滑翔傘,離開個島時,我地就轉左坐快艇,坐到一半路程,就可以雙人玩,上到半空,遠望軍艦島,水質一流,清到見底,一路滑到差不多返到主島,真係善用每分每秒,果時先係下午三點多,咁我地又身痕地被人撩左去fun dive,體驗潛水半小時,沙灘邊教吓你基本呼吸,手勢就落水,不過今次潛水個位真係麻麻地,軍艦島仲多魚,阿Q精神就覺得叫多一次潛水經驗囉。玩埋fun dive真係盡慶。


岸邊成日都會見到二次既遺
到左第四日blue cave tour,一早聽完briefing就出發,呢個tour除左去blue cave次外,仲會去埋以前打仗遺留下來的一些遺址,好似山洞軍事醫院,係入口係寒到無人會行入少少個山洞,仲有日軍自殺後,集體自殺個崖,真慨嘆當年戰爭之恐怖,幾千士兵一齊同家屬自殺,唉。仲有將軍保守據點,留低左D大砲同軍車,好淒涼嘅感覺,雖然你永遠唔會enjoy去呢類型景點,但你可以襯機會了解歷史,親眼見識戰爭帶來嘅禍害,都未嘗不可。

blue cave入口


Blue Cave 水面
講番重點行程,到左blue cave入口,我地行落一條好長嘅樓梯,小心奕奕咁行去入口,見到個洞穴水池,個guide就話到左喇,跳落去啦!我即時嚇一嚇,但二話不說就跳,因為唔想阻住人而且已經好熱,個洞大概有二,三十人係度,一半浮潛,一半潛水,落到水好爽呀!等埋大少同個guide,佢帶住我地潛入水一望,嘩嘩嘩,有個藍色天然洞穴係池嘅另一邊,那種藍係好神秘,好迷人的那種藍,好靚呀!因為個藍洞係穿出大海,所以水脹時,你會浮都好高,而水退時就好似有股力扯你,好過癮架,大家係唔使怕危險,水下有好多潛水員係度準備穿過藍洞出海,當然佢地個個都無advanced level嘅diver啦!就係呢個原因,大少覺得我地係有必要考潛水牌,終有一日,我地可過blue cave嘅(而家先考左open water咋,有排先夢想成真!),浮下沉下,影左一大輪相,我地個tour就完結喇,雖然唔係全日係水裡面,但經歷嘅又係新鮮事,總之今次Saipan之行就大滿足啦!

好神奇的藍色
藍到唔令人相信
Local Tour 仲有去左日軍最後既司令部,情況同城門水塘個戰壕差不多,另外有個山洞,係日軍當年既軍事醫院,真係企係門口都唔會想行入去。。。個感覺好Sad


最後既司令部
最後一日,臨走前都係酒店私人沙灘租kayak玩,好爽,不過當越來越近一部海中坦克時,由於個心太寒,睇戲太多,呢架坦克嘅戰爭畫面出晒來,所以我地都無真係走近就回頭啦,寧願又同魚仔玩好過。

帶住萬般不捨,我地就回程了,作為一個轉工嘅break,陽光與海灘係一個好好選擇,身心放鬆之餘又可活動relax吓,正!