黃心遊世界陽光與海灘篇-Saipan塞班島上

11:41:00 PM Unknown 0 Comments




Saipan即係塞班島,關島隔離,屬於美國既一個島,去果度旅行,目的只有一個,盡情享受陽光與海灘,我地幾時都咁鍾意同陽光玩遊戲,親親海洋世界。
由香港出發去Saipan,而家已經無直航喇,我地當時去係直航5小時到當地,對比其他東南亞島國,可能有人都嫌遠左少少,而家無直航應該更少人會揀Saipan。咁咩國家嘅遊客會去Saipan多呢,咪就係日本人囉,以前日劇都會去塞班取景,變左幫手宣傳呢個地方,所以當日本經濟差時,無$旅遊,Saipan都有影响,好多日本食店結業。

酒店望出去的景色
酒店的私人沙灘
都係講番我地今次個trip先,我地平時住hostel,apartment多,今次想住吓有私人沙灘嘅酒店,少有地(其實係唯一一次)買package,揀左Kanoa Resort Saipan,整體感覺OK,係房無Wi-F,大堂接收又差左少少,可能而家已經有改善,現代人無得上網會痴線架,同埋離市中心遠左少少,雖然有shuttle bus,但食飯下下去咁遠又要限時趕shuttle都有D煩,市中心附近有幾間resort都幾好,下次會識揀。


今次堅無安排行程,純玩,嘆同休息,夜晚落機休息一晚,第二朝即刻去私人沙灘游水,嘩,無諗過酒店個沙灘已經好多魚,因為太平洋戰爭時,留左D坦克或金屬係海,就變左熱帶魚嘅安樂窩,基本上只要一潛入水就會見到好多種魚,正到暈,好彩我地有自備snorkeling goggles,咁隨時想落水就落,唔使計租一套要幾錢,幾耐最抵。

不是太深水便可見到這景色

係得酒店hea左一陣,當然我地都不甘只留係酒店,即刻上網搵local tour啦,大少第一選擇係去kayak,我地揀左北面海域,簡簡單單玩兩個鐘包埋snorkeling,即日book,以為要第二日先有得玩,點知中午12點就來接我地,可能淡季,兩個客都唔放過,哈,又俾我地可以用盡D時間,Yeah~

Ocean Kayak 

Kayak 時經過會看到二次大戰時美軍留下來的坦克
Kayak個tour包埋簡單BBQ lunch,我地坐係沙灘邊一路食,一路聽briefing,一個guide加我地兩個,嘩,正。出發啦~ D水係crystal blue,好清,一路都可以見到底,我地兩隻kayak(我無信心一個人,所以只好迫大少同我一架)都係沿海岸行,風浪都唔算大,行左大半個鐘,去到一個area係可以泊好隻kayak,個guide話果個area D水深約一米半,係果面海岸嘅熱門snorkeling嘅地方,我地就咁跳落水就玩,好過癮,魚好多,guide準備左餅乾俾我地引魚,結果唔使攞D餅乾出來,所有魚都好似知有人就有得食,自自然然游晒過來,我地就不停試吓影相,太多魚會擋住個鏡頭,好好笑,而個guide就不斷嘗試捉八爪魚俾我地睇,可惜個季節唔太啱,佢只捉左條魚俾我地睇,徒手捉魚確係勁,我地當然會放番條魚啦!玩左大半個鐘,回程又用左大半個鐘,兩個幾鐘頭嘅tour就好快完結喇,因為個travel agent係一間酒店裡面,所以我地可以免費用酒店沖身,泳池,感覺好抵,之後我地順便報埋之後軍艦島同blue cave兩個tour,叫做5日4夜中間3日full day都有節目,令人好興奮。

Sapain 的岸邊也可看到這珊瑚礁呢
晚餐時間我地都會出去市中心食,食足3晚美國大餐,因為水準好,價錢平(對比香港),反正平時係香港兩個人少食美國菜,皆因碟碟都大堆頭,食飽飽就去行全市最大嘅souvenir shop,旅行有時係要寫意D,今次旅程真係輕鬆,Saipan俾人感覺好relax,當然帶點點美國feel,咁啱遊客又少少地。


黃心遊世界亞洲篇 <日本站- 熊本>

2:55:00 PM YellowSumTravel 0 Comments



熊本可能不是日本最出名嘅旅遊地區,但熊本熊就可能係日本最受歡迎嘅吉祥物,果隻黑色大熊配兩個紅紅面珠,又真係幾可愛嘅,佩服日本好有心思每個地區都有自己嘅吉祥物來吸引遊客,每年仲攪吉祥物大賽,熊本熊都有羸過架。


位於九州嘅熊本,係去九州旅遊必到嘅地方,今次日本我地係自駕遊,所以感覺好方便,但其實我都想坐吓日本有名嘅火車架,熊本同阿蘇火山嘅觀光列車係好出名又好靚,或者將來有機會可以再來的話就坐啦!而家都係乖乖地做乘客先,日本自駕其實真係好容易,由於大少同我哥哥都係打日本game大,個GPS佢地好快上手,入日文地址都難佢地唔到,而且GPS個反應都好好,比韓國好很多啦!

係熊本住既hostel
除左住之外,間hostel 仲有染布Workshop玩
我地一早由長畸開左兩個幾鐘車過來熊本,我地又係沿路D公路餐廳開餐,每次食親都唔會覺得失望,味道一定唔差,食店隔離仲一定有手信賣,當係臨離開果個縣最後買手信嘅機會,所以我地都好鍾意呢D公路休息站,公路上會有一D有刀刀叉叉嘅路牌來標示休息站就係附近,唔食嘢,當去吓洗手間都好,所以自駕時都要留意吓喇!





好快就搵到間民宿,今次間民宿好大,我地住8人房,結果得我地一行3人住晒,每個床位都有屏風間開,好日本風,咁一早放低晒D行李,我地就即刻出發去熊本第一大景點-熊本城,哈哈,先唔講熊本城點,3月尾竟然執到少少櫻花水尾,仲見到好多學生仔係度寫生,好多本地人野餐架,一早就有好開始,真開心。

櫻花加上熊本城,好日本呢



熊本城乃日本3大名城之一,同大阪城,名古屋城齊名,其他兩座就未去,但整係睇熊本城又真係幾滿意,自小睇日本卡通片大嘅香港人,十居其九對呢類古城外貌唔會陌生,因為好多卡通都出現過,不過第一次親眼睇同係現場,感覺真實好多,同好多古城一樣,熊本城都有外圍城墻,主城會係中央最高位置,我地由底慢慢向上行,你唔需要地圖都一定搵到架,一路行一路賞櫻,好快就到左熊本城中最重要嘅天守閣。

天守閣望出去



天守閣內展覽左好多加藤清正時期的歷史資料,武器等等。而上到最高樓層,可以欣賞一下熊本城四面嘅風景,從高處望又另一番感覺,我地都差不多抖留左成個鐘,因為要慢慢拾級而上,返回天守閣門口,俾我地遇到有D人扮將軍同著和服,遊客可以排隊影張相,哈哈,我地都有影,反正到此一遊,唔好浪費吖嘛!

細川家刑部
參觀完熊本城,我地去第二個景點-細川家刑部,細川家係三百幾年好威架,阿哥係熊本城城主,咁就送左好大塊地俾個細佬,細佬就起左呢個豪宅做茶屋,之後改左別墅,最後係做左宅邸,簡單D講,即係去參觀幾百年前嘅豪宅囉,去到要除鞋入內參觀,攪到真係去似去左人地屋企咁,感覺呢度度似卡通片D屋,不過大好幾倍,我地一路行一路會諗,古時D日本人係室內係咪唔會企起身,定係佢地真係好矮先,無間房大少可以企直,我就勉強可以企起身行,哈哈,不過呢度確實好舒服,每間房望到嘅園景都有用心安排,而且光線好自然,幾百年古宅來講,都無陰深嘅感覺,如果有時間,來呢度睇吓,叫做認識吓日本人舊時嘅建築都好呀!仲有好多影相位架。



每一個框望出去都好似幅畫




果日見仲帶D時間,5點人地收工前,4點半趕入去-水前寺成趣園,又係細川家個阿哥城主建造嘅,都係三百幾年前,為左招呼客人飲茶吹水嘅地方,中央有個大水池,依呢個中心再加D山山石石,小橋流水,錦鋰一定要有啦!成件事好日本,悠悠閒閒咁,試想想係中國,會有幾多大叔,大嬸,攪到無晒mood扮上等人去欣賞呢D山山水水石石啦!約莫行左大半個鐘,人家關門,我地說閃人了。
水前寺成趣園
日本九洲個行程以觀光,浸溫泉為主,行街shopping就得熊本呢一晚時間,我地黃昏時間開始即刻飛去-上通下通,行街食飯,一定要試當然就係熊本多蒜拉麵,個味道同其他九洲地區有分別架,我就唔太like蒜,但大少同我哥哥就覺得好正,食一碗係唔夠飽架。
係上通下通D舖頭都集中係度,藥妝,衫,鞋都有得行吓,不過真係唔太多,當然仲有夾公仔嘅舖頭,只要你一開始左,個哥仔就不停幫你,直到你夾到為止,果時你又唔好意思收手,用左幾多都唔記得,只係記得最後都夾左索柏先走人,都無所謂,來得日本,夾公仔都係要做吓嘅。

好好味既九洲拉麵
行完街就再食2輪晚飯,一碗麵真係填唔飽大少,我地揀左好耐,想食咖喱,食多碗拉麵定點好,最後因為有睇日劇嘅關係,就去左居酒屋嘅物體,食串燒,餃子,飲啤酒,因為果間食店夜左都好多人係度吹水,我地去感受吓當地人嘅生活嘛!

熊本確實有好多有歷史價值嘅地方去,算做可以了解下日本古時文化囉,而自然觀光仲有阿蘇火山,另一篇先講,所以抵熊本可以係芸芸日本城市中,近年越來越多人去。

黃心遊世界東歐篇 <布拉格- Prague>

10:16:00 PM Unknown 0 Comments



上一次來捷克的布拉格時,我仍然是一名旅行菜鳥,旅行經驗5隻手指數得晒,果陣時internet book咩都未普及,我地每次轉地方都係到埗先搵住宿,還記得當年一落車,就俾五六個阿婆阿伯,拿住一兩張相片就介紹他們的民宿,有D其實係佢地屋企分幾間房出來租俾遊客,那時隨隨便便便跟了一個不太懂說英語的婆婆回家住,真係博一博,亦都無咩好驚嘅,因為當年嘅旅行模式就係咁,所以話臨場經驗真係儲埋唔少。今次再去布拉格,一出火車站時,完完全全感受到什麼叫十年人事幾返新,當日那個滿佈子彈孔的車站已變身成一個兩三層樓的商場。月台上已沒有任何公公婆婆在招客,大街上也滿是H&M, C&A 等商店,連一些手信的鋪頭也變得十分商業化。唯一沒變的,可能是舊城的風光,布拉格仍然係歐洲最美麗城市之一。







今次我們住在舊城內的一間apartment, 一房一廳,在 booking.com 上找的,地點十分方便,又可以煮飯慳錢。放低行李後便四出走走這個舊地重遊的城市。在廣場旁發現了一個有趣的local tour, 名字叫underground tour,完全因好奇的關係,我二話不說便報了名,大約黃昏時段開始,一日有兩次,時間差不多兩小時。

underground tour & ghost tour

四圍行吓次後,我地就返去Join個Tour喇, 開始之前講左一些布拉格歷史背景,Underground Tour 名字的由來。原來自2003 年一次水災後,在布拉格舊城意外地發現各處也找到一個個大小不同的地下室,地下室的年份可追溯到羅馬時期。由於大部份地下室屬於私人物業,一般遊客比較難去到,只有一些在餐廳的地下室因開放了給客人使用才帶機會參觀。

你可想像它有一個羅馬時期的地下室?

地下室


今次tour 去幾個地下室,一個是在一間賣酒的鋪頭 下,另一個是在一間coffee shop 下,原來今天布拉格所謂的ground floor,在羅馬時期是一樓,因時代轉變和水災連連,當年的ground floor 便慢慢向下沉,居民便在上邊起樓了。你可能會問做乜咁耐都無人發現,又或者無人知呢?呢點真係無人知。只能說可能和布拉格這個名字的由來有關,Prague 是英文,如個有去過的朋友,應會知道是 Praha, Pra- Ha 意思是河中比較淺水的地方,淺水的地方易生活,人便會開始集中在一起,村莊會慢慢形成,個guide 話最早有人住可追溯返去八世紀或更早,慢慢發展成城市。咁你話關個ground floor 向下沉咩事?係一個淺水的地方上邊起個城出來,又點會唔慢慢沉下去?個guide 係咁講,我估可能係淺水多沙吧。但証唔証明到呢個論點無人知。如你喜歡一些古怪的history background,呢個tour 都岩你去,另外同一間agent 有另一個ghost tour ,我個人十分十分想去,都係去地下室但講鬼故!!可惜黃心佢超驚,所以無join 到。

由呢隻窗望出去,就係廣場啦
一係地下室上返來,就係呢個位

另外今次竟然俾我搵返成十年前食過果間cake shop,十年前試過,一試難忘,地點都係廣場附近,但要知道舊城區條條街都差不多,好彩舖面仲係綠色,同以前一樣,呢個小店能在這個發展得咁快既城市生存到,當然好味啦~ 4日內我地食左兩次,真係唔知幾時會再來布拉格,到時間cake shop仲係唔係到,都係一個問號。

十年前食過既小店

去歐洲小鎮旅遊嘅優點係你可以無plan,先隨意係舊城區行下,一定會行到去Charles Bridge,欣賞吓日落,之後晚餐食左捷克豬手,諗住同德國D豬手比較下,兩隻其實差不多,捷克版細D,都好味。
好靚既日
第二日去下城堡果邊,入城堡前做左件低能事,事源我同我好朋友6仔對布拉格嘅印象,最深刻應該係"天地雄心",劉華來呢度救李嘉欣,因為佢好鍾意劉華,我決定去搵番個場景影張相送俾佢留念,又真係俾大少搵到果個樓梯口,咁就影左呢張經典劇照,哈哈,有時做點小小瘋狂事,可以令個旅程增添色彩,哈哈。

超爆笑既相片
入左城堡,上tower要另外收費,但可以從高睇吓成個布拉格,我地覺得都係值得的,講明,上呢座tower係行樓梯上,慢慢由好窄嘅螺旋樓梯上,放心,上到去即刻有張長椅俾D遊客抖抖氣,嘩,上到去果然唔會失望,一片橙色屋頂,石磚做的大街小巷,好美的一張風景圖,和我所期待的布拉格一樣,慢慢欣賞這個城市。總之,布拉格城堡一定要去嘅。

城堡
城堡內既教堂

我地都做左一些一般遊人都會做既事,就係鐘樓下等個鐘響,呢個點解咁出名,因為已經有六百年歷史,岩岩係2010年係六百周年紀念,1410年起既,係行機械結構嘅鐘樓,現在少之有少,雖然短短十幾秒,但以當年工藝已經好出色喇,睇完個鐘點行,可以上鐘樓參觀,由高處再近睇廣場,見到另一批遊客又等睇個鐘行,感覺好得意,全部遊客都得一粒米咁大,但堆滿鐘樓前面,我地曾經都做過粒米。

我好喜歡這張Clock Tower 上玻璃的倒影,有種人來人往既感覺



如果去歐洲,布拉格係一個好好嘅選擇,呢度仍然很美呢,仍然是歐洲最美麗的城市之一。




黃心遊世界南美篇 <阿根廷站- El Chalten>

11:15:00 PM Unknown 0 Comments



El Chalten,可說是安地斯山脈( Andes) 的開始,亦都被譽為阿根廷行山既首都,更加係出發去Monte Fitz Roy的起點。你問我乜係Monte Fitz Roy?一座3405m 高既雪山,亦都係Lonely Planet 阿根廷既封面。


遠望Chalten,一眼睇晒

由Buenos Aires坐飛機到El Calafate, 放低大部份行李係hostel(回程先玩Calafate, 遲下再講), 輕裝出發去Chalten trekking去了, wakaka, 我地大少腳已經好痕喇! …..經過約3小時風光如畫嘅路程, 我地終於來到Chalten 既tourist center喇! 果度會有專人約略解釋一下每條trekking路線嘅難度, 方向, 有咩風景等等, 我地就按時間, 能力去揀邊條路線最適合自己(咁大少實覺得每條都得)

風光如畫嘅路程
Chalten第一個俾我嘅感覺, 咦, 咩咁細嘅, 可能得個維園咁大喳,但D食宿, 舖頭都集中係小小嘅市中心, 大部份人都係市中心整頓, 之後再出發去trekking或者camping, 呢度有十幾條路線可以行, 所以一D都唔細, 我地會留係Chalten留3日, 要諗清楚揀邊條route呀! 時間有限嘛!


山俓位於山谷的中間,所以上落不大
第一日我地去左行ROUTE A, 來回24KM, 要6HRS, 因為出名trekking, 而唔係hiking, 所以上落起伏唔大, 唔太難行, 沿路D植物係香港見唔到嘅品種吧! 

上落起伏不大
寧靜的山俓
慢慢沿著山俓走入有D似電影世界嘅森林, 真係好舒服,自問係終香港都已經成日行山,但呢到感覺好闊,個天好大,左右兩邊都係大山,有種心曠神怡既舒服。如果你只見慣的石屎森林, 呢個絕對能令你驚嘆! 行到呢條路終點係一個位於Cerro Terro雪山下, 冰川旁, 名叫Laguna Torres嘅湖,簡簡單單坐係湖邊,望住個雪山,很淒美, 很寧靜, 一副與世無爭嘅樣子, 真係可以望幾個鐘,我都係第一次睇呢種景色呢~Umm, 總之, 呢一日trekking, 呢一個湖 令我畢生難忘啦! 另外湖邊有個camp site,早知係來camping 啦,又可以睇日出。我地仲見到有人準備第二日再出發去Ice Climbing 上雪山頂呢 )

Cerro Terro


Laguna Torres


第二日係Chalten, 我地揀左條easy D嘅ROUTE B, 等我地輕輕鬆鬆行吓山, 又可以影多D相, 我同大少慢慢慢慢上山, 回頭一睇, 縮小了的Chalten市就在眼前, 完全感覺到自己係地球另一邊, 因為這裡跟香港高樓大廈完完全全不一樣, 行左兩個鐘左右, 我地來到Laguna Capri, 呢個湖附近特別多人camping, 我地見到人地大大小小嘅tent, 都好羨慕, 又好想有機會係度試吓camping, 可惜最終都無機會, 逗留左係湖邊hea左一陣, 我地又沿原路返市中心, 其實Chalten大部份路線都係原路來回, 所以回程可以省卻搵路時間。



簡簡單單由山俓望出去,己經見到呢D 咁靚既景色
Camp Site
Laguna Capri
第三日黃昏我地就要返Calafate, 所以沒有去trekking, 反而去租左mountain bike去睇waterfall, 沿Route E短短地踩入去, 上上落落都幾攰 (我話攰係不代表大少立場), 風景當然好好啦! 我地踩下停下, 影下相, 個幾鐘就入到個waterfall, 當然你話壯觀又唔係架喇! 勝在可以親近又可以影下相咁, 玩左一輪水, 我地打道回downtown啦!

mountain bike時間
Waterfall D水清到你唔信
唉, 點知回程落斜時, 我架bike太快失控, 炒左車囉, 好好彩唔係山涯果邊, 唔係就大件事, 世界果然有好心人, 有架車即刻停低睇下我情況, 我右手, 右腳比較傷, 但仍然可以慢慢推番架bike返去, 之後去左downtown唯一一間小醫院, 雞同鴨講咁洗左傷口, 開左藥單去另一間買紅藥水, 藥係醫院係無得買, 旅程開始無耐就整親, 行動係有D唔方便囉! 不過都慶幸無大礙.

下畫5點坐車返Calafate, 返到去8點, 結束左我地愉快3日trekking嘅時間, 但8點天都未黑, 呢度屬於南美洲南面, 夏天日長係好耐, 成十一點個天先黑晒, 哈哈, 時間變得比較見洗囉 攪到會夜瞓左, 因為天唔黑, 唔願瞓囉!

後記: 旅途上, 我同大少都不時討論離開香港可以撈咩, 大家都覺得可以係Chalten開間腳底按摩店, 來呢到嘅人一定trekking, 之後一定好想massage架, 一定有得做啦! 當離開Chalten的時候, 我有唔捨得呀! 之後暗暗同自己講, 希望有一日可以再來, 再來行晒其他route, 再來慢慢享受........